早陣子，一位年僅八歲的小女孩又出版了其新作，這已是她的第三本個人作品，出版社還表示銷量不俗。即使不是要當小作家，多讀課外書對小朋友，不但有助提升語文能力，更可發展無窮創意！
記者：盧家蕙
攝影：陳盛臣
「係好書，唔需要迫佢睇」
貴為香港才子，現年47歲的陶傑，書一定看過不少。不過我倒想知道他小時候是看甚麼大的：「睇《兒童樂園》、《老夫子》、《十萬個為甚麼》、衞斯理、金庸、梁羽生的小說等等，聽就聽商台、港台的廣播劇，重有睇西片囉。」
在英國修讀英國文學的陶傑，認為「中國人識Teaching、Training，就係唔識Education。」不過他並沒有送兒子入讀國際學校，而讓他去了「既傳統又紮實的」聖保羅男女小學。他說：「國際學校啲學費咁貴，呢樣加吓又幾千，嗰樣又幾百，邊值得㗎？而且入面太Liberal了。對小朋友最好只有教會學校，而基督教就能培養兒子是非觀念，道德教育更是事半功倍。佛教、孔子嗰套太難明了，《聖經》舊約咁多故事，一定滿足到小朋友的好奇心。」
對於推薦小朋友睇乜書，陶傑苦口婆心地說：「閱讀是終生習慣，又可提升個人修養同知識，咁先做到人上人。小朋友睇乜書冇得強求，亦唔好迫佢哋睇，好嘅書唔需要你迫佢睇，佢想睇自然就會睇。」
「中文打穩基礎就得」
「香港教育唔得，應該話全球華人嘅教育都係三流的。我寧願香港行番卜卜齋個套（背誦強記）重好。要想小朋友好，送佢哋去外國讀書，學好英文，即使返大陸做生意都係講英文啦。」經常大力鞭撻中國文化的他認為：「其實中文只需要打穩基礎，講求清通實用，溝通到就得啦。全香港有幾多人中文係掂㗎？香港的中文教科書都係垃圾，最叻就係搵錢，改咗少少無謂內容就加價。就算係國語都唔使學，我自己都睇吓VCD、聽吓歌咁都學到。」
話雖如此，中學時代讀唐詩宋詞元曲的陶傑，也要用利誘手段教兒子背唐詩——念懂了便「有錢畀、有糖食」。可見所謂「溝通到就得」，要求其實也不低。
講到親子活動，口邊時常批評人家「老套」的他，也有「老套」一面：「臨瞓前講古仔啦，（講安徒生童話？）唔止，偵探古仔囉，重會講鬼古，我自己作㗎咋，等佢哋驚吓，哈哈。小朋友要夠Innocent，你叫九十幾歲的邵逸夫睇殭屍片佢重識唔識驚？」果然係一個狡猾的慈父。
兒子自選圖書
陶傑貴為兩子之父，7歲的泰澄和2歲多的泰頤，他們又愛讀甚麼書呢？「大仔睇《西遊記》連環圖，重有《HarryPotter》啦！細仔睇《丁丁歷險記》、Thomas火車頭圖書等等啦。唔使同佢地揀書㗎，帶佢哋逛書店時，啲美國佬書設計咁特別、插圖精美又Colourful，細路就會自動自覺去睇㗎喇！」
中文推薦──冰心
問推崇外國教育的陶傑，小朋友想學你話齋「打好中文基礎」，應該看甚麼書？他想也不想便說：「冰心啦。文字夠淺白易明喇。」
出版社副總編輯：兒童書要正面
不少研究指出，與父母一起早期學習的孩子無論在智力、語言發展和社交技能方面，都較沒有的孩子優勝。有20年編纂兒童書籍的「新雅文化」副總編輯何小書，認為給幼兒選書，一定要充滿童趣，圖畫清晰，顏色鮮明，而且內容能夠帶出正面訊息。小時候影響她至深的書就是《愛的教育》，她笑說：「因為內容太感動人了，翻睇之時甚至會睇到喊。不過現在愈來愈少人看這本書，可能文藝了點吧！此外，我還愛看成語故事，細細本，睇得好方便。有時候碰到其他出版社出了很精美的手工書、玩具書，我都會買來給女兒看。」
兩類兒童書
一）幼兒書
可選多元智能概念書，故事簡短有趣，能使幼兒的視覺更加敏銳，刺激他們講話，擴充字彙，並且擴大他們對周遭事物的認識；無字書則故事主線全靠圖畫表現。父母可鼓勵幼兒看圖講故事。
二）初小階段
可選擇科學叢書，讓小朋友通過實驗，悟出大道理，發展IQ。亦可選擇多元智能創意畫冊，可讓兒童根據提示自由畫圖，發展認知能力。帶故事性的兒童小說亦是不俗之選。
《玩轉實驗系列》$38
通過實驗，認識水、光、空氣等，由材料到步驟都一一列明，讓小孩進行危險性低的實驗。
《海嘯真情故事－跨越生死的愛》（$48）、《妙探三人組》（$48）
此兩位作者馬翠蘿、麥曉帆是母子，兩書齊入選十大好書龍虎榜。馬翠蘿為兒童文學作家，此小說以一群少年男女在南亞海嘯的遭遇，發揮人性光輝一面。
