近呢三個月，唔少SHARP發燒友每日途經「機場」，喺手機舖櫥窗外徘徊，似乎等待緊一樣嘢，冇錯！就係等緊所謂「正式解鎖」嘅日版Vodafone903SH（即行貨SHARPSX833）！喺今個星期，903SH嘅最後防線終於被專業「解鎖佬」突破，試過唔單止能接收晒全港各大3G台，重可以上網睇片及Download鈴聲，加上支援全中文介面，對正版貨SHARPSX833嘅打擊，絕對沉重！
記者：陳國輝
攝影：譚盈傑、陳國輝
ImageGirl：Yumi
「解鎖」之意，即係將手機裏面嘅「SIMLock」程式移除，令其能接通所有網絡咁解！早在日版Vodafone902SH（即行貨SHARPSX813）流入本港之時，本地改機舖已成功破解其鎖機方法，並透過更多款機身顏色，及比正版貨更平嘅售價開賣！雖然，呢部903SH曾因為「TestMode」風波而遭到滑鐵盧，但未夠三個月，「解鎖佬」又再宣稱成功破解其「SIMLock」程式，並自行命名推出所謂嘅「香港中文版」及「台灣中文版」兩種，情況如同第二間SHARP出機，相當搞笑！
TestMode風波
所謂「TestMode」風波，就係早期聲稱的解SIMLock，其實只是將部902SH設定為測試員模式，最大問題係冇MP3或AAC鈴聲玩、冇中文顯示，更大鑊者是每次開機、關機都會MasterReset，即係所有機內儲存資料都會被洗去，變回剛出廠時咁「新機」一部，真係搞到機迷怨聲載道！今次日版Vodafone903SH據稱被「真」破解，而且使用介面，更聲稱有台灣中文版及香港中文版選擇，暫時以上TestMode各項問題，都已經被完全解決，真係道高一尺、魔高一丈！
903SH解鎖買家迫爆場！
喺11月2號下午四點左右，記者到達位於旺角通菜街嘅改機專門店，未進入店內，已赫然見十多人嘅長龍排到出走廊，但情況未見混亂；查問下還發現，原來大部份客人都係得知「解鎖」消息後，專登嚟買日版903SH！
「解鎖」後各項功能試玩
未「解鎖」前，部份水貨佬曾經將「TestMode」版903SH當正貨售賣，雖然已經打通其他網絡，但仍遺留好多問題，呢種做法有隱瞞消費者之嫌，買家要絕對當心！至於今次嘅所謂正式解鎖，係咪真正完全冇問題呢？記者就試玩過「TestMode」時出現過嘅問題，但為免重蹈覆轍，建議大家只作個參考！
顯示及輸入中文
「TestMode」版只能夠顯示英文及日文，但係今次就能夠出埋繁體中文，記者重試過將中文SMSSend去該部手機，證實顯示及輸入中文字都無問題。
回復原廠設定
如果「TestMode」版熄機後重開，會回復原廠設定，即係鈴聲、屏幕保護以及所有手機資料，都需要重新輸入；但「解鎖」後就冇咗呢個問題。
設定MP3鈴聲
「TestMode」版一直唔能夠將MP3格式直接設定為鈴聲，必須透過轉換為MMF檔先做到；但係，今次就能夠聽MP3歌，重可以Set作鈴聲。
長按後自動關機
據講，「TestMode」嘅關機掣，係測試員為方便快速關機而設，所以㩒半秒就會熄機；今次終於回復正常，必須長按關機掣先會熄機。
解Lock版903SH潛藏維修隱憂
歸納好多買解Lock機人嘅心理，不嫌麻煩做大手術都要買部解Lock機，兼冇原廠保養都肯制，最大原因係「色」字當頭，水貨903SH有黑、白、紅3色選擇，行貨就只得紅機！另一個原因係解Lock機嘅機價較平，以現時勁炒起的黑機903SH為例，機價連解Lock費用只係$4,580，潮人至愛的白機則為$4,280，而同行機睇齊的紅機則為$3,780，相對現時行貨單色紅機重做緊$5,680，差價有成$1,100-$1,900，好多玩家一心諗住執平嘢，所以就改玩解Lock機。
改機後有否問題出現，由於太「新」嘅關係，所以暫時重未浮現；不過水機冇原廠保養，亦是一大問題，加上經改機後，以後手機如出現問題，日本原廠都一定唔會維修，雖然改機公司表示會有一年免費保養（唔包零件），但過後的維修服務，就有可能成為改機公司的「獨市」生意，所以在保養及維修費用上，實在潛藏好大隱憂。
「解鎖」工具：一部電腦就夠！
「咪睇到解鎖係一件咁複雜嘅事！」喺改機行內做到響朵嘅Jerry話，平時幫客「解鎖」嘅主要工具，其實好簡單，基本上有一部電腦以及Cable線就足夠！記者踏入Jerry呢間唔夠100平方呎嘅工作室，見佢一邊做訪問，一邊正埋手進行日版703SH（即行版SHARPSX313）嘅最後「解鎖」程序。結果，唔使半個鐘，呢部掛住「香港中文版」嘅703SH就咁誕生咗！喺「解鎖」過程入面，雖然避免咗拆殼及拆零件等「開刀」步驟，但係當睇見枱面上嘅電線一條接一條，好似幫部機「插喉」咁，其實心裏面都有少少心寒！
謝利記（94331563）
旺角通菜街1A-1J威達商業大廈1211-1212A
