有線電視俾小小超檔Now強搶（搶客戶又搶頻道）一輪後，終於還拖，噚日宣布將佢哋最皇牌的新聞台同電影台大革新。電影台呢，講真，華華唔覺有乜特別囉，但新聞台就真係有睇頭。由明年1月3號起，新聞1台同2台會分別改名為「有線財經資訊台」同「有線新聞台」，其中前者會打正旗號主攻財經。
華華心諗，Cable呢一着，第一，唔使講梗係硬撼Now籌備明年初登場的財經台；第二，將於１月重開的港交所交易大堂日前賣廣告，叫傳媒同廣播機構競租佢哋３個直播室，但要先交計劃書畀港交所過目，咁Cable話要做財經台，唔使講一定要爭！
講開Cable，留意到一樣嘢，就係佢哋好興在TVB檔新電視有搞作之前一日郁手，好似今次咁，新電視日前已發晒帖，話今日見記者講推出8大收費頻道，但又俾Cable突襲。不過佢哋就好少截Now糊，唔通淨係驚年少氣盛的小小超，淨係敢蝦六叔同六嬸兩位老人家？