黎姿曾與鄧萃雯、佘詩曼傳不和，黎姿表示若要有是非才有人氣，她寧願不要人氣。演過不同角色，黎姿希望演武則天、慈禧太后或阮玲玉等傳奇女性，認為這些角色更有發揮。
黎姿去年奪得無綫台慶「我最喜愛的女主角」獎，今年台慶又再傳出女藝人爭獎是非，今年黎姿已不去想獎項的事，她相信一切皆有天意，黎姿說：「順應天命啦！走好自己條路，做人最緊要係唔好有歪念，本住冇嘢去後悔嘅心態做人，始終路係自己主宰。」
嫌不和傳聞悶
無綫花旦經常傳出爭寵、不和的新聞，過去一年亦多次傳出黎姿與鄧萃雯、佘詩曼口和心不和的傳聞，黎姿表示若要有是非才有人氣的話，她願意不要人氣，她說：「我唔鍾意是非，傳嚟傳去都係呢啲好悶，我同阿佘合作過咁多次，其實係可以傾到心事嘅好朋友，就算係競爭對手都可以係良性競爭，唔好再話我哋係假姊妹，真係好老土，我同佢見到面都會做番應該做嘅事，同事之間唔一定要勾心鬥角。」
黎姿續說：「我同雯女更加冇嘢，佢送eyecream畀我就永遠冇人寫，我做唔到佢演嘅角色，佢亦做唔到我嗰類角色，大家各有專長。我係天秤座，本住咁去做人，唔會再炒是非喇。」
內心戲有發揮
加入無綫後黎姿覺得已達到自己的要求和目標，《妙手仁心III》播出後，到現在播出《胭脂水粉》，收視不俗，演出過多個角色後，她希望能演一些類似武則天、慈禧太后，甚至是阮玲玉的傳奇人物角色，黎姿說：「我覺得呢類女人起跌好大，角色好有發揮，我鍾意演多啲內心戲。」
採訪：魯萍 攝影：陳偉權
髮型：Hair＠KevinKoo
化妝：NaviLam
場地：HeiHeiClub
