做賓卡，可以唔識睇數，但一定要識打波，低過100桿更加好。華華識得一位澳洲賓卡，佢嘅主要工作就係四圍去陪客打波，佢話都好辛苦，但真係攞到唔少生意。
無端講起打波，皆因滙豐贊助的上海國際高爾夫球賽，下周四開始一連四日在上海舉行，剛剛去北京出席完〈Euromoney〉會議的滙豐銀行大班鄭海泉，同埋隨銀行公會訪京團大隊的執行董事王冬勝，到時又要風塵僕僕飛往上海。
中國高球活動起步遲，但發展步伐快到勇冠全球，因為內地大把地，起球場話咁易，今次個大賽在佘山國際高球俱樂部舉行，全球排名首50位的國際著名高球手，好多都會到，肯定星光熠熠，相信獎金好和味。華華收到料，屆時王冬勝重會同老虎仔活士（TigerWoods）同組出賽。
講完古仔教打高球
老虎仔球技超班就係人都知。據聞，Peter王近年都操得好行，呢位銀行界梁朝偉，又睇得又打得，好似話試過一桿入洞呢。記得早前佢主講「滙豐同我講故事」，佢老哥講英文古仔之餘，又教啲細路打高球，搞到班小朋友鬼死咁開心。相信面對老虎仔等國際級對手，王冬冬點唔得閒，都會秘密練兵，拉近啲距離。
李華華