東亞運動會進行得如火如荼，有份贊助及提供技術支援的微軟（Microsoft），昨日請傳媒過大海來個澳門一日遊，順道睇埋韻律泳比賽。
其實，微軟算係第一批到澳門開分公司、開拓市場的國際級企業，擔任開荒重任的業務發展經理曾祺，曾在IBM及澳門政府任職多年，放棄鐵飯碗下海，最大壓力「梗係業績啦！」曾祺話，前年9月上任之時，全公司只得自己一個，正式的辦公室都冇，東奔西跑９個月，做出成績，到去年６月３日才正式成立澳門辦事處，至有個竇。
另一個澳門辦事處的話事人，是由香港調去的方案經理李健鵬，佢同華華透露，澳門地方細，人同人之間的關係緊密過香港好多，分分鐘個客就住隔籬，而個對手就住對面，大家都好清楚對方，所以競爭大過香港。兩年幾以來，當地的業績升咗兩倍，來年就希望生意再升三四成。調任澳門年多，除了幫公司爭生意以外，放工就返歸食咖喱飯睇電視，所以足足肥咗十幾磅！