再有滙豐成員「空降」恒生！滙豐銀行姐級人馬薛關燕萍，明年起會代替即將退休的莫偉健，出任恒生銀行營運總監一職。不但成為恒生銀行首位女性COO，更會再次與舊老闆大俠柯清輝共事。除咗佢哋兩位之外，現任恒生執行董事兼副行政總裁潘仲賢、財資業務主管張泰強等，都係滙豐出品。
薛太喺滙豐服務咗29年，現職滙豐香港個人理財業務主管，負責滙豐在香港個人理財業務發展，過檔恒生後，會負責營運風險管理、後勤支援、資訊科技、電子銀行、物業管理、保安、營運與工序等，成為恒生的「大內主管」。薛太走咗之後，邊個會上佢個位呢？看來又有一番執位，多得莫先生退休！
至於喺恒生服務39年的莫偉健，會於明年4月1日退休，出任行政總裁顧問；常務董事職花落誰家，要等恒生個board決定先知。