自由行遊客當初塞滿三星酒店，後來益埋四星酒店，到咗今年，唔少內地人入住中環金鐘五星酒店，相信以後佢哋對五星酒店嘅重要性愈來愈大，酒店管理人員淨係識英文，已經Out晒，唔識講番幾句京腔普通話，行埋一邊得嘞。五星酒店總經理，大部份係瑞士人、德國人，佢哋識英文法文德文意大利文以至西班牙文，偏係唔識日文中文，如果你係本地人，想做佢哋副手，話自己英文好醒，但唔識普通話，日文更加不懂，請問你有乜嘢競爭力？
識普通話起碼可以同內地客交涉，禮貌地趕一啲野蠻客走。最近酒店界傳出消息，內地大款財大氣粗，在超豪酒店撒野，三五成群飲到醉醺醺之後，凌晨返到酒店，粗聲交談，引起其他住客注意。酒店人員與之交涉，竟有大款男士話急到要即刻小便，嚇親清潔阿嬸。佢哋重話香港酒店人員冇禮貌，睇佢哋唔起㖭。
旅遊李得知之後，長歎一聲：「內地同胞唔知到幾時先至識得旅遊文明，𠵱家冇晒佢哋符。啲惡死大款多數係內地有財有勢人士，喺北京上海惡慣，佢哋三五成群，鍾意幾時嚟香港都得，使乜聽旅遊團領隊講：到咗香港，唔好隨地吐痰……諸如此類。總之阿叔有錢，有乜嘢唔做得！我知道高級酒店收佢哋錢，絕對唔客氣，因為麻煩客係應該畀貴啲嘅。對佢哋嚟講，住房要幾千銀一晚，發吓脾氣都唔得？真係秀才遇着兵，有理說不清。」
旅遊李話，假如酒店管理人員只識港式普通話，大家冇法子溝通，重加麻煩，所以酒店前線人員一定要講普通話講得流利標準。左丁山之流，如果要用三千蚊一晚住酒店，會覺得好肉赤，見到內地同胞花錢如流水，只能歎一句自歎不如，點解自己唔識搵銀，又慶幸香港幼稚園識得教唔好在公眾地方小便！