陳奕迅（Eason）前晚假會展舉行拉闊音樂會，雖然表現失準，但氣氛異常熱烈。Eason唱得非常投入，多次做高難度動作又自摸下體，還high得大叫三聲老婆。
陳奕迅前晚在灣仔會展舉行「903IDCLUB拉闊壓軸音樂會」，將所有歌曲改編成跳舞音樂，故他將音樂會戲稱為「醫生Disco」，現場一半是企位，氣氛格外熱烈。Eason邀來EO2、林海峰和張學友等任嘉賓，雖然Eason常跟不到拍子又甩嘴，令他十分𤷪𤺧，但無損fans的投入程度。
做高難動作
Eason前晚很high，開場時已向觀眾喊道：「你哋準備好跳舞未？有冇飲酒？食咗嘢未？」及後他與EO2一起跳舞，雖然Eason早年在台灣演出時曾傷及下體，但他並未因此而留下陰影，在台上大跳大叫，做出很多高難度動作。Eason從高台跳下時擘一字馬，以致下體激凸，及後又做倒豎葱、自摸下體和單腳跳等。Eason說：「係咪好迷（情緒高漲）？我唔知迷咗去邊呀，第一次喺會展搞啲咁嘢，未試過做企騷，好『wing』呀？『wing』唔『wing』呀？」Eason又忽然大叫三聲「老婆」。
當Eason介紹學友出場時，亮着場館燈光，二人在台上繞圈，學友還險些絆倒。Eason說：「係咪未試過冇音樂企喺台度，打個招呼你就走得。」觀眾聽罷即起哄，二人遂合唱一曲《吻別》，全場掌聲雷動。Eason又問學友：「你幾時出碟？」學友說：「我唔係為宣傳而嚟㗎。」
狂擲螢光棒
完騷時，一半觀眾不願離開，並擲螢光棒上台，未幾Eason重回舞台說：「人哋明明好型咁走咗，點呀？又開始過？我今日想試新嘢，點知搞成咁，你哋做乜掉嘢上嚟？柴台呀？成個樂壇知我係黑面神，我同小春都係咁，柴台我走㗎。」觀眾大叫不要走，Eason遂留下唱多五首歌，劉浩龍此時亦上台合唱。Eason見觀眾不願走，他說：「唔好咁，我要湊女，不過我都冇乜點湊個女。」
Eason事後表示徐濠縈和女兒均有捧場，問他為何大叫老婆，他說：「我睇新聞見啲人迷咗嘅時候會叫老婆，我扮嗰啲人。我成個人熱血沸騰，耳仔聽唔到嘢，好抱歉唱得唔好，我得四日排。」
採訪：胡比
攝影：林德雄
