郭富城憑電影《三岔口》角逐台灣金馬獎影帝，馮仁昭八到曾經執導《殺手蝴蝶夢》、《名劍》以及張國榮同葉童主演嘅電影《烈火青春》嘅導演譚家明，佢月中會開拍一套七十年代背景嘅新片《父子》，譚家明已經落實搵城城夥拍楊采妮，佢哋扮演兩公婆，重有個五歲大嘅仔。
不懂表達愛意
《父》片月中會去馬來西亞開工，城城扮一個思想同性格都老土嘅廚師，因為唔識得表達愛意，同老婆楊采妮嘅婚姻出現問題，佢就要做「帶子洪郎」喇。城城同楊采妮都有成十年冇合作，馮仁昭聽講佢兩個會有一場激烈嘅親熱戲，從來未扮過老竇嘅城城，𠵱家已經開始學扮老，都算新挑戰。問到城城對攞金馬影帝嘅信心有幾大？佢淡然話：「我以平常心看待。」
此外，城城最近幫舒適堡健身中心拍咗新一輯廣告，張叔平以「秋意」做廣告主題，正好配合𠵱家秋天嘅天氣。城城喺阿叔指導下赤裸出鏡，下身只摟住沙龍布紮成嘅短褲，大晒結實胸肌。
