個市急升兩日後，唞一唞氣。禽流感新聞未消失，但股民個心已經定好多。
恒指昨日升幅唔算大，得25點，但上升股份係下跌股份嘅1點4倍，屬於良好現象。類似早前三下五落二嘅急跌，估計唔會再出現，而會趨向個別發展。
窩輪變化急劇，例如昨日推介嘅聯想C輪9383，高低相差27%。早段最低價上車，40分鐘後賺27%，但摸頂入市，到尾市差不多輸1成。
國壽C輪3487：昨日推介嘅國壽C輪9177，上升7%，有成交嘅國壽C輪，升幅最大係佢。
睇好國壽，可搵隻3487短炒，隻輪與9177同樣係明年2月初夠鐘，但槓桿率細1半以上，爆炸力與殺傷力細啲，但溢價則抵好多。3487收40仙，只升得1格，溢價5.3%，槓桿率14.2倍（有效8.5倍），引伸波幅28.1%。呢隻交投多，買賣易，睇錯方向斬纜一啲都唔難。
思捷C輪4791：隻輪下月初夠鐘，輪價20.3仙，溢價0.4%，槓桿率27.5倍（有效15.3倍），引伸波幅27.6%。正股（330）耐唔中發神經，4791當賭錢買幾手博吓，要大注亦唔可能，皆因隻輪交投非常有限，有時空白一片。
章盛