濠賭股受歡迎程度已經大不如前，早前全部隨大市回落，加上賭王揸旗的澳門博彩有傳聞話研究上市，令到其他濠賭股被沽得更勁。
經紀黃話，唔好忘記信德（242）本身亦透過澳門旅遊娛樂間接持有澳博權益，賭王近日大手增持信德股份，反映佢對公司有一定信心。
信德除咗澳門博彩概念外，其餘港澳地產、船務等貢獻不俗收益，近期股價回落唔少，現水平有得諗。
信德股價過去1個月，由6至7元水平跌落嚟，最低見過5.45元，係52周低位，昨日回升1.72%，收5.90元，成交股數652萬股，金額3772萬元。
另外，早排提過被沽得過份的泛海集團（129），近兩日股價顯著回升，昨日再升10.9%，收0.305元，成交股數4619萬股，金額1379萬元。
雖然泛海現價相對公司的資產淨值仍有好大折讓，但失驚無神升得咁急，況且加息不利地產股，喺低位揸咗，係時候考慮獲利。
慕容小初