昨日3點半前，個市牛牛皮皮，忽然期指插水，急跌105點，似有人想做世界，不過恒指冇跟住插落去，最多只跌50點。埋單計，期指微跌4點，恒指微升4點。
大市經過早前急跌後，大致確認短期見底，但升市時高追C輪仍然不宜，忽然有平貨則入市。
恒指C輪9224：個市當做上落市，恒指跌一百幾十點之時，買恒指C輪。其中值得做即市嘅係9224，昨日波幅16%，而恒指波幅則只不過0.7%（103點）。
9224明年2月杪夠鐘，輪價13仙，溢價4.7%，槓桿率29.6倍（有效14.3倍），引伸波幅16.9%。恒指每變動100點，隻輪理論價值升跌10%。隻輪昨日跌4.4%，其實係跌凸咗少少。吼12仙邊邊上車。
恒隆地產C輪3664：恒隆地產（101）係昨日跌幅較大嘅地產股，收11元，唔見0.25元，係第2大跌幅恒指股。影響所及，恒隆地產C輪3664散11.5%，收15.4仙。恒隆地產係基金股，跌得落去彈得起身，3664可博反彈。隻輪明年6月中夠鐘，溢價5.1%，槓桿率7.1倍（有效5.1倍），引伸波幅28.6%。恒隆地產另有C輪9170，99.9%機會等住作廢。
章盛