今輪英超聯有周日進行嘅曼聯對車路士呢場好睇唔好賭嘅大戰，要搵贏錢球隊，可吼主場出擊嘅阿仙奴、紐卡素及樸茨茅夫三路大軍，分別以「讓球主客和」、「主客和」及「讓球」出擊。
阿仙奴對住升班球隊一向表現醒神，上季聯賽同三支升班隊對碰，主客兩循環共計六場，錄得四勝二和；其中主場就曾大勝水晶宮五比一，以及大勝諾域治四比一。今輪聯賽主場鬥今季升班馬新特蘭，睇嚟亦係大捷格局。
事實上兩軍喺上月已於聯賽盃交過手，當時新特蘭主場，阿仙奴重要係派晒副選上陣，結果都贏三比○晉級。今日亨利、皮利斯及伯金等主將出番場，新特蘭想輸少過兩球都難。「讓球主客和」梗係捧「主勝」。
紐記近排順暢唔怕追
紐卡素近期愈踢愈順，贏吓一場贏吓又一場，已經三連勝；就算前兩個禮拜係東北部打吡戰，最終都能夠主場贏新特蘭三比二。周六佢哋有主場之利，對手就係狀態相反、愈踢愈沉嘅伯明翰。伯明翰近六場只係喺聯賽盃賽事，主場贏英冠球隊諾域治二比一，聯賽就已經四連敗。暫時睇唔到呢支中部球隊有乜「反底」本錢，追多場紐卡素Ｗ都得嘞。
周六英超聯重有一場樸茨茅夫主場對韋根，主隊上周作客，兼無咗主將羅拔仔，重要半場落後對手新特蘭，仍然可以喺下半場連入四球反勝兼大捷，氣勢甚佳。其實再對上一場，佢哋主場對住查爾頓時，最後雖然反輸一比二，但已經踢咗場好波，上仗贏波實有迹可尋。
韋根受讓係時候斷纜
韋根呢支升班馬奇兵，好多人都睇緊佢哋幾時斷纜，呢場機會都幾大。始終球隊近期連勝戰果，大部份都係以一個入球擊敗對手，後面頂得住唔失波咁解啫；但幾位守將都屬於老將級人馬，狀態未必每場都可以保持。呢場波「讓球」樸茨茅夫讓平/半，好似引人博韋根下盤咁，一於取樸茨茅夫上盤。
文：華度