油價咁貴，個個都話要慳油，講到慳油傳聞，的士司機認第二，無人認第一。未用石油氣的士之前，佢哋一日行五百幾公里，經驗真係多到你唔信，今次就講吓佢哋以前慳油嘅傳聞。（五粒★為最慳）
攝影、記者：伍旋卓
慳油有好方法，個個都話自己嗰個得，唔理有無用，其實都幾好笑㗎，我哋今次更會測埋傳聞嘅真確性。
傳聞1：用一支槍
聽講有關部門會抽樣檢驗油站嘅油槍準確性，大多會選油站內的一號槍，或最後一支，所以呢兩支槍係最準確。
測試結果：我哋問過油站，答案好例牌：我哋好準㗎。我哋同時響不同槍入三百蚊油，油表無大幅上升，行駛里數亦沒有分別。
真實性：★
傳聞2：搖車
車主一聽到午夜起加價，立刻會去油站打爆缸（即入滿油），一邊入一邊搖部車，慳一毫就一毫。
測試結果：一邊入油一邊搖部車，可以將油缸內氣泡排出，我哋個46公升油缸，搖完車，可入多兩公升。
真實性：★★★★
傳聞3：慢槍
原來有啲油站可以揀慢槍模式入油，雖然入油時間會長咗，但有傳聞話係準確好多。
測試結果：唔係好多油站有呢種服務，其實慢槍同快槍一樣咁多錢，一樣咁多油，無分別，行駛里數差不多。
真實性：★
傳聞4：入半缸
入油唔好入滿喎，因為入滿油會令部車重咗，特別係市區行駛。
測試結果：入半缸油，部車輕咗，真係慳油咗，啲1300c.c.細馬力車仔就最明顯。
真實性：★★★★
傳聞5：窄車胎
用比較窄嘅車胎，氣壓打至37PSI，減少與地面嘅接觸面，原理同單車一樣。
測試結果：用太窄嘅車胎，轉彎時穩定性不足，車速亦不可太快，比較危險。我哋建議用番原裝設定嘅車胎尺碼。
真實性：★★★
傳聞6：裝AFC呃行車電腦
好多車都用電子燃油噴注，控制最好的燃油比，有人就用一種外置式的AFC電子儀器，更改入風量感應器嘅訊號，不同轉速就有不同耗油量。
測試結果：真係好有用，可以設定不同轉數，做出不同效果，不過呢架AFC好貴，成千二蚊，如果每公里慳兩毛，要行千二公里至可回本，我哋遲少少會有試用報告。
真實性：★★★★
傳聞7：換火嘴及機油
換上新火嘴同機油，令引擎暢順一點，行起上嚟都會慳油啲。
測試結果：無錯，呢兩個方法係會慳油，但一定要原裝指定型號的火嘴，而機油就以高流速的0-30W最好。
真實性：★★★★★