足智彩首次為英格蘭足總盃第一圈賽事開盤，但只係為安排喺今日及下周日進行嘅八場比賽受注，周六進行嘅三十二場就一於唔理，可能係周六各地聯賽同時進行，已經夠波玩嘅緣故。
由於英超及英冠球隊，要到較後階段至亮相，呢一圈比賽只有二十四支英甲、二十四支英乙、及三十二支從外圍賽晉級嘅非聯賽組別球隊參與。對於本地球迷，莫講話英乙球隊，甚至連今季足智彩有得玩嘅英甲聯球隊，都未認得清楚；呢八場足總盃嘅吸引力，對筆者嚟講就唔係太大。即管喺度做番啲近兩屆賽事數據，畀大家參考下。
上季四十場第一圈賽事，有逾半數共二十三場開出入球「大」戰果；和局戰果只得六場。前一季就有二十九場開「大」，和局戰果又係好少，只有四場。再前一季，「大」波又係過半數，有二十四場，和局出現率高番些少，但都只有十場。依此走勢，不妨放膽博下「大」，及避開取和局就啱嘞。
文：華度