犀利啦，禮拜日曼聯迎擊車路士，可謂掀起今季四大聯賽最高潮！費格遜縱橫英格蘭球壇近二十載，今次面臨近年事業最大挑戰，如果被車路士所敗，烏紗隨時不保。到底係紅魔破釜沉舟「反底」，抑或於主場被擊潰，象徵正式改朝換代，屆時自有分曉。文：藍鑽石
近年領軍無起色，最近兩連敗，爵爺前途早亮紅燈，偏偏此時遇上全英最強球隊，當真不合時。對爵爺來說，最難應付並非車路士球員，而係敵方領隊摩連奴。莫說當年摩連奴於歐冠盃帶領波圖淘汰紅魔，去季轉戰英超後一樣「食住」爵爺，四次對陣未嘗一敗。未開波，爵爺個勢已輸一半。睇馬會操盤手開初盤係由車路士「讓球」作客讓平手/半球，行情係點一目了然。
車仔誓搏老命省招牌
車路士同樣於周中歐冠盃輸波，不同之處係擺明留力，今場波唔出杜奧巴就用基斯普，又點會再由古莊臣在前線行行企企？「油王」阿巴莫域治入主「車仔」，左顧右盼無非想做「一哥」，去季贏完聯賽，未夠，今次一定趁紅魔病攞佢命。全世界當晚都會睇住呢場波，你話有咩嘢比作客擊潰英超傳統最強勢力更威水？
季前同人講韋根有機會過聯賽榜「二哥」癮，有人信至奇，偏偏升班馬屢創佳績，踢少車路士一場少九分，曼聯、阿仙奴都得個望字。樸茨茅夫後衞奧拜恩今場始終趕唔切復出，隊波今季主場又未贏過，唔通搵隊奇兵開齋咁神奇？