楊千嬅昨日為藝術工作者廖東梅的畫展擔任主禮嘉賓，二人同是今屆傑青，千嬅表示認識東梅後令她少了抱怨，更希望將來出書時，廖東梅可替她畫插圖。
楊千嬅昨日在九龍塘為「藝術．生命——廖東梅作品展」擔任主禮嘉賓，廖東梅與楊千嬅同是今屆的十大傑青之一，她們在畫布一人髹一筆，作為畫展的揭幕儀式。
出書邀合作
原來二人早在兩年前已認識，千嬅憶述說：「我記得兩年前喺一個再生勇士活動時識佢，當時佢已經話好想開畫展，佢𠵱家終於開到，真係戥佢好開心。」
千嬅大讚對方的畫非常有意思，每一幅都有主題，她最欣賞一副名叫「樂韻陰陽」的畫。千嬅說：「佢話我聽本來係叫『對牛彈琴』，不過佢覺得個名唔係咁大方，所以就冇用到，你話佢個人幾謙虛呀。」
問千嬅有沒有要求對方送一幅畫或特別為她畫一幅畫，她說：「咁我又唔敢叫佢送畀我，佢每一幅都係藝術品，不過如果遲啲我出書，都希望可以搵佢合作，喺我本書度畫啲插畫。」
自覺甚幸福
千嬅不諱言認識廖東梅後令她對人生少了抱怨，她說：「佢雖然有殘障，都咁積極做自己喜歡嘅事，咁我又行得又講得嘢，真係好幸福，有乜嘢抱怨都要即刻收聲啦。」
採訪：胡比 攝影：何榮亮
