聯儲局議息前，港股竟直迫14600，大升185點，全日收14572，成交達193.5億元。市場再傳人民幣會升值，兼且人行放寬香港人民幣業務，中資及投機資金入市掃貨，國企指數大升108點至4878。恒指兩日反彈355，不過期指仍低水30點，黑客擔心淡友最終會大反擊。
H股想加入恒指
黑客話，今次人行進一步放寬人民幣業務，但本港賓架未滿意，因為銀行仍然唔能夠做人民幣貸款業務，估計有排都未能開放。事實上，國內的金融開放改革，一定唔會為咗迎合香港而加快開放步伐。
最近當上行會成員的李業廣，要求恒指服務公司將H股納入恒指成份股，睇嚟關永盛可能受咗唔少壓力，但暫時佢仍維持原判，拒絕加入H股。建行（939）市值逾5000億元，若加入恒指便成第三大藍籌股，指數基金如盈富（2800）自然要調整組合，即係增持建行減持其他藍籌股，屆時其他現有藍籌股所承受的壓力，未必輕得過關先生。
中華網（8006）噚日打開口牌，話市值未能反映公司長期價值，所以董事會決定用1億元入市回購，但暫時只得個講字，因本月11日公布第三季業績前，公司的回購行動受到限制。不過股價仍炒高13.4%至0.55元，以噚日成交金額1177萬元計，1億元唔使10個交易日就會消耗晒。
生命科技（1180）揚言快將推出抗感冒藥品《葡萄糖酸鋅噴鼻劑》，企圖染指抗流感醫藥市場，聽講此股最近有投機買盤收集，唔知幾時會開車呢？生命科技收0.088元，逆市跌1.12%。
阿虎