早前江欣慈（Liz）同外籍男友分手後，感情終於有着落，前晚Liz同一名男子十指緊扣喺蘭桂坊慶祝萬聖節，佢哋一邊行一邊喁喁細語，就算記者舉機影相，佢哋只係甜絲絲咁笑。當時馬路好多車，佢男朋友亦好細心咁拖實Liz隻手。
而喺蘭桂坊，亦有隻大受歡迎嘅「鬼」，就係黃夏蕙，馮仁昭發覺夏蕙姨化咗鬼妝之後，順眼過平時好多。夏蕙姨話唔想喺醫院嘅胡百全見到佢化到鬼五馬六，所以佢變身一隻靚鬼。
超瓊面紅紅
夏蕙姨又話要開始向法庭申請取消佢見胡百全嘅禁制令，佢重攞咗一大堆同胡百全嘅合照、情詩出嚟同馮仁昭講解一番。
另外，平時斯斯文文嘅導演黃真真前晚就扮戴住手銬嘅女警，而喺近十一點左右，何超瓊、超蕸、陳鴻業同女友鄭詩韻就喺鏞記大廈出嚟，超瓊重飲到面紅紅㖭！
