恒指再升185點，3隻重磅股中移動（941）、滙控（005）與和黃（013）總共為恒指添88點。兩日計埋，恒指共進帳357點。上周五人心惶惶之際，大概冇人有水晶球會估中個市兩日間會有如此彈升幅度。
恒指已越14500，估計會趨向個別發展。
聯想C輪9383：大市升，唔係所有C輪都意氣風發。唔計冷門貨，是日跌幅最大嘅窩輪，係聯想C輪9383，前日49.5仙，昨收33仙，跌幅33%，前日10萬銀揸隻輪昨日得番6萬7，成交金額1300萬元。
9383大散，係因為正股（992）中午宣布半年業績，賺多13%，市場唔收貨，正股跌27.5仙，收3.525元。聯想係芬佬推上推落股份，咪睇得咁淡。9383不妨細細注，博反彈。隻輪明年2月尾到期，溢價8.7%，槓桿率10.7倍（有效6倍），引伸波幅39.2%。
國壽C輪9177：保險股有勢，國壽（2628）升10仙。短炒C輪，搵9177埋手。隻輪明年2月初夠鐘，輪價16.4仙，溢價7.2%，槓桿率35.1倍（有效13.9倍），引伸波幅21.5%。想更搏殺，揀4702。
章盛