聖誕節人們想起聖誕老人，我卻想起紅菜頭。紅菜頭一般外國入口，其實香港冬天的天氣也適宜種植。通常我會在九月中下種子，約12月中，聖誕節前後便有收成。紅菜頭色鮮紅，榨汁後遠睇真係以為飲緊紅酒，十分應節。我試過整杯紅菜頭汁畀阿標歎，佢見我飲得咁滋味，死頂話好飲，不過我知佢頂唔順其中的澀味。所以我會將紅菜頭切碎，加些碎芒果、薄荷葉、西柚肉做沙律，酸酸哋中和它的甜澀味！種紅菜頭對我嚟講有種湊仔Feel，除咗種植時間要三個月外，在它幼小時期，還要特別照顧，尤其長到1吋高最脆弱，需小心保護；長到2-3吋高，又會因高出泥土容易折斷，要小心堆泥把它掩埋，這樣才生長得好。一般農夫實在冇咁好心機搞咁多嘢，對於我，愈有挑戰性的事物，便愈有興趣，成就感會更高，吃起來更甜美，因為其中有我的愛心嘛！（三十六）
阿花