佳士得今年秋季拍賣會月底在港一連拍4日，精品無數，第1場預展在新加坡舉行，已在上月結束。今個禮拜六、日，在北京國際俱樂部飯店做第2場，跟住去上海同台北。25號起在會展同大會堂展覽，唔想飛又想睇靚嘢者千祈要記住。
今次拍賣有兩場賣中國近現代畫，單係第一場已經有250件精品。其中7幅林風眠，係張永霖所藏，佢重以「蒼涼壯美林風眠」為題，寫咗篇文章講述自己對林的認識及收藏經歷。原來，張第1張買嘅林風眠作品係「春曲」。今年七月，重去杭州訪林風眠故居（圖二）。
其實除咗呢7張，張永霖今個禮拜六重會在北京拍賣47件書畫，所以呢兩日就會北上。問佢點解咁捨得？佢話以前啲畫平，現時很貴，自己不斷要買新藏品，所以要沽出一些非核心收藏。佢又說收藏策略要不時檢討，路線亦會變。
張永霖自從離開電盈，曝光減少，但一講到畫，就好雀躍，佢話最近買咗俄國科爾日夫的油畫，又話買畫容易賣畫難，實在好唔捨得，好似嫁女咁！
咁呢個月張家肯定喜事盈門，先在京嫁一批女，再在港嫁7個女，恭喜晒。
李華華