菜肉魚之食住上：<br>狗仔隊𠱁食南瓜圈　YoYo：吓？狗糧？

菜肉魚之食住上：
狗仔隊𠱁食南瓜圈　YoYo：吓？狗糧？

本身養開貓的YoYo陳自瑤最近幫朋友睇狗，於是帶埋佢哋去蒲新開的DogCafe識朋友仔兼食嘢，剛巧遇着專售日本狗時裝的DogParadise老闆娘，同她的愛犬代言狗Ice，二人大談狗經之餘，重試過狗餅……OK喎！
記者：趙善怡
攝影：陳偉強

■專賣狗仔用品的corner內衫、褲、狗兜、狗繩都一應俱全。

狗仔隊　無調味料夠健康

最新開張「狗仔隊」的室內陳設最見老闆心思，落地玻璃配上潔白的裝潢，感覺自然。店內出售的狗仔食品不含調味料，講求原汁原味，人食嘅菜式都唔差㗎！另設有強勁吸力的狗廁所，咁就唔使怕污穢啦！

自製焗餅不含糖份

狗仔隊主打狗仔食物，如以南瓜、香蕉、麵粉焗成的南瓜圈（$14/件），另以花生、麵粉及牛奶做成的狗骨形硬條餅（$2/件），可堂食也可買走。

食狗糧實錄

靜靜雞畀YoYo試吓呢款狗食嘅南瓜圈先……

小心狗仔偷食！

狗主咁錫班愛犬，但亦唔可以餓親自己呀！記者覺得呢間DogCafe最好食嘅就係咖喱雞扒飯，再嗒埋杯士多啤梨芭菲就最perfect！雖然不是酒店級，但亦落足料，前者配有薯仔、洋葱及紅蘿蔔，日式製法辣味適中略帶甜；後者賣相勁靚，內有粟米片、Oreo曲奇、雪糕及朱古力醬，有多重口感，小心狗仔偷食呀！

多重口感：士多啤梨芭菲$36

辣中帶甜：咖喱雞扒飯$48

狗仔隊（28815030）
地址：銅鑼灣新會道2號2樓

DogOneLife狗仔自助餐

漢堡扒通心粉$18
以香草、牛肉、雞蛋和麵粉作材料的漢堡扒，以不需用油的烤焗方式製成，狗仔食咗唔怕肥！

香蕉窩夫$18
就連我一見到都想咬下去的香蕉窩夫絕無化學發酵成份，加上可助小狗腸胃蠕動的乳酪調味，夠晒天然又健康！

DogOneLifeDogCafe（31055912）
地址：銅鑼灣駱克道459號2樓

■牆上掛上唔少狗畫同裝飾。

壹樓狗室　肉骨腸好似狗糧

踏進店內已經被店主劉小姐的狗仔們所包圍！狗仔玩具及滑梯隨地擺放，方便盡情玩樂。相對其他樓上cafe而言，這裏提供的人狗食品無論是賣相定質素都相當有睇頭！

好醒胃㗎！狗室燒烤肉骨腸$48
唔好誤會，呢味係人食嘅！肉骨腸以雞肉做成的，把它配上酸甜汁一起吃，滋味無窮！

狗用醬汁雜菜雞肉飯$48
聽店主講呢款清烚雞肉配白飯是最受狗主們歡迎的！皆因它無添加夠健康，只淋上自製雞肉汁作調味，小狗食完重唔舔舔脷!?

壹樓狗室（61022030）
地址：銅鑼灣百德新街66-72號海灣大廈1樓B室