經紀陳噚日好勤力，收市後去咗前稱金龍船，家陣剛剛改名做黃河實業（318）嘅推介會，聽吓人哋新收購嘅大陸典當生意，前景有幾秀麗？
經紀陳話，由於黃河股權易手無耐，股價一直炒到㷫烚烚，家陣股價雖然較先前回落咗些少，但市值仍然超過90億銀，媲美好多中型股，所以要去睇吓有關業務嘅盈利前景，可唔可以支持𠵱家咁高嘅市值？
黃河剛以2000萬銀人民幣，間接購入北京一間典當行，佢哋將呢個概念包裝得好靚，以消費融資自居，即係本地的私人財務公司，兼且用美國同埋日本嘅例子比較，揚言大陸市場好有潛力。
經紀陳又話，上個星期有報紙引述內地官員講話，話呢門生意仍然係外資禁地，所以古仔雖然動聽，但仍有多少保留。況且就算前景點正都好，都係計唔通點解可以支持家陣90億的市值。
黃河昨日微跌1.77%，收1.67元，成交股數93萬股，金額158萬元。
慕容小初