肥仔Ｙ喺沙田體藝中學畢業咗，去咗美國著名設計學院，雖然冇美國綠卡，後來畢業後立即俾美國公司賞識，代佢辦工作證，喺紐約做咗五年工，鳥倦知還，返嚟香港。在紐約之時，佢貪得意申請去意大利羅馬深造藝術與設計，竟然得咗，於是喺香港辦手續，明年去羅馬讀書，雖然明知自己唔識意大利文，會讀得好辛苦，但喺羅馬逗留年幾兩年，有機會去佛羅倫斯、威尼斯及各地古城觀賞文化遺址，達文西、米高安祖羅嘅真迹，機會難得噃，點可錯過，好彩喺紐約打工五年，有啲儲蓄，勉強可以負擔得起。
攞特區護照去意大利領事館申請去意大利讀書，原來好鬼麻煩，繁瑣過申請美國學生簽證好多。最重要就係收入及財政來源證明，肥仔Ｙ父親交出銀行月結單，公司股權證明（肥仔Ｙ父親係公司老闆），肥仔Ｙ銀行月結單，持有信用卡副本（正反兩面），面見時拎出信用卡正本，逐張核對。肥仔Ｙ攞到簽證之後，舒一口氣，點知佢有位親戚來自大陸持中國護照，想話去意大利行吓，攞唔出信用卡銀行信件及月結單，點搞呢？親戚話去到意大利會用現金若干萬元，領事要佢將所有現鈔帶埋去檢查。肥仔Ｙ話：「抬現鈔去攞申請簽證，真係新鮮經驗。」
問肥仔Ｙ去羅馬讀邊科？佢話：「我喺美國讀建築學與藝術，冇考到建築師牌，打工就做LightingDesign，我哋公司有好多合約，自由神像嘅燈光照明，我有份參加設計㗎，紐約街頭有唔少我嘅作品。呢次去羅馬，讀一個「FurnitureandLivingDesign碩士」。咁前衞，返到嚟不如幫啲豪宅示範單位做室內設計。左丁山省起以前為咗貪靚，買咗一個由意大利設計大師設計嘅「榨橙汁儀」，成八百幾蚊，用咗幾次，老婆話手痛，改用番十蚊一個嘅港產塑膠器嚟榨橙汁！