世界貿易組織（WTO）第六次部長級會議下個月十三至十八號先喺香港舉行，但係特區政府以至商界、政界同外交界都如臨大敵，叫所有人standby唔准放假，以防萬一。
五萬醫護戒備
嗱，呢單蘇州屎真係要多謝英明神武嘅唐司長，因為當年係佢同老董膽粗粗接番嚟做，以為有彩攞，點知搞出個大頭佛，班歐美大佬到今日都唔肯讓步，「香港宣言」分分鐘泡湯，真係賠了夫人又折兵。但係，唐唐就因為升咗級做財政司司長，呢單嘢到𠵱家都唔關佢事。
當然有危有機，只要文明順利開會，咪可以威畀鬼佬睇，所以早前有人傳話所有政府醫院已經接到醫管局通知，五萬幾員工喺開會期間唔准放假，所有非緊急手術全部叫停係堅嘅。知情人士話，冇人知嗰班請願人士會唔會做投擲燃燒彈等大殺傷性激烈行動，到時可能連私家醫院都要徵用埋，所以啲唔緊急嘅手術咪叫班醫生唔好安排做住，叫病人等吓。
吓，咁都得？香港人為呢個世界口水大會犧牲都好大啫！知情人話，都冇法啦，鬼叫香港支持自由貿易，又冇入黑名單，等於係冇掩雞籠，任由佢哋嚟搞事，大家只好求神保佑，病人就更加慘情。佢又話，其實香港醫院都慣晒咁做，前年沙士時期，所有相關部門都係冇假放，全部處於戒備狀態，而就算冇WTO，禽流感一樣嚇人，邊有得休息？
除咗醫務人員之外，啲外交人員都唔准離開崗位，重做好晒特別證件，因為隨時要支援個口水會，話就話歐盟國家同美國唔合作，但係佢哋都要扮嘢支持呢類國際組織。特區洗濕個頭冇得退，煲呔同肥龍兩兄弟惟有頂硬上，以後真係咪搞我咯。
爆料熱線：29290000、27860099
報料傳真：26239278
報料電郵：[email protected]