港股連續兩日大反彈，噚日再大升185點，收14572，重上10日平均線（14411）之上，向20日線（14603）進發，今次跌市，恒指落到250日線（14184）水平反彈，兩日大升後，現時確認中期見底的可能性已有8至9成。
恒指落到14189後回升，短線在14600會有阻力，唔排除會回落200至300點，再試低位支持，若能形成高低腳的底部更佳，升破14600後，應該好快會見15000。
噚日大升，暫時仍係以幾隻大藍籌做主力，二三線股雖有跟上，上升股（唔計認股證）更增到486隻，但細價股嘅氣氛始終唔多夠，冇辦法，家吓看淡者仍佔大多數，要等大市確認再起新升浪之時，佢哋先會再入番市。
貿易通（536）係近期上市新股中，特別有動力嘅一隻，噚日係上市後第3日，卒之發力上衝，高收1.38元，升7仙，亦係上市後高價，呢個位一穿，照度上去，起碼可見1.48元。
政府滙控電盈俱為股東
貿易通係電子商貿服務供應商，香港政府、電訊盈科（008）同滙豐控股（005）都係股東，上市發售2.33億股，售價1.25元，以6.8至8厘息作招徠，家吓股價上升，但仍有6厘息。
港府原本持有貿易通42%權益，為免利益衝突，上市後已減持到16%，庫房亦因此而套現2億元，政府表明會長期持有貿易通股份，估計投資回報可觀。其他股東電盈同滙控各佔8.12%權益。
集團制訂咗長遠發展大計，主力爭取數碼貿易運輸網絡系統（DTTN）、外地加工措施嘅電子安排、陸路跨境貨物預報資料、同艙單電子化等多方面嘅商機。DTTN明年4月全面推出後，希望在5年內取得4成嘅市場佔有率，亦有計劃透過顧問及投資方式，協助海外和中國建立電子貿易平台。
招股書預測05年（12月年結）盈利8500萬元，以今年首10個月的表現看來，盈利應可超出此數，集團嘅派息政策係05年及06年派發不少於除稅後純利的8成，其後則不少於6成。公司手頭有現金4億元，零負債，高派息政策不會對公司發展有影響。
中油（香港）（135）周一大升後，噚日在高位整固，形成旗形後再上，目標將指向9月中高位1.83元，可繼續持有。
郭兆誠