近幾日唔少工業股陸續有人出嚟唱好，昨日輪到玩具股彩星集團（635）發威，由低位急彈14.56％，收1.18元，成交股數急升至3131萬股，金額3592萬元。但經紀黃提醒小初，話港股整體投資氣氛仍然好一般，要小心為上。
經紀黃話，好似中國燃氣（384）剛公布搵到實力投資者做股東，但昨日復牌，股價只係抽高過一格咁大把，最終更要下跌1.6％，收1.23元。
其實投資者並唔係話呢個消息唔好，而係覺得公司頻頻搞批股，策略投資者數目眾多，攤薄效應明顯，況且現價又唔係高，批股價重要有折讓，所以並非十分正面。
中燃今次係以每股1.16元，向麥博士管理的基金同荷蘭開發銀行配售佔已擴大股本5.1%的新股，集資1.53億銀。小初雖然明白經紀黃所講嘅問題，但就覺得佢哋今次認購新股，附有禁售期，所以都算對得住其他股東。
慕容小初