李八方話曾特首去華盛頓，見唔到布殊總統，訪美之行略為失色。左丁山認為曾特首唔使失望吖，試問中國各省市領導人去到美國，有邊個可以與副總統及國務卿會面？上個星期，白宮陷入一片忙亂，四面受敵，布殊提名貝南克接替格林斯潘，廣獲好評，算係沖喜，但係跟住佢嘅法律顧問邁爾斯被逼放棄最高法院大法官之提名，副總統切尼親信利比被獨立檢察官檢控，跟住辭職，布殊嘅軍師羅夫可能捲入事件；美軍在伊拉克陣亡人數達到二千，美國傳媒大做文章！咁多事件之中，布殊重要飛去佛羅里達州視察風災，抱吓嬰孩。布殊忙得咁交關，點樣可以抽出二十分鐘同曾特首握吓手，寒暄幾句呀？李柱銘去華盛頓，見到美國總統，算佢好運，佢唔知係唔係揀過吉日吉時，知道白宮幾時安安樂樂，內外太平呢？
政治人物做騷，揀時辰好緊要，唔係要睇通勝喎，而係要想到一啲絕佳藉口，增加公關曝光率。好似彭定康咁，為咗要賣多幾本書（新著NotQuitetheDiplomat），特登返嚟香港演講，泰昌蛋撻老闆又識做，吼正呢個時候，為新舖「正式」開張（已經做梗生意嘅嘞）請肥彭去幫幫手。呢勻正是一家便宜兩家着，到時中外傳媒必定逼爆蛋撻舖，影肥彭食蛋撻，如果泰昌老闆到時買定一百本NotQuitetheDiplomat，請肥彭簽名，義賣，捐款畀公益金，重更加大收宣傳之效。左丁山唔知肥彭喺邊日去泰昌，若果各位嘅公關活動與肥彭撞到正，因住至好，慎防記者唔得閒嚟，或者次日啲報紙版面俾肥彭搶晒。
曾特首跟過肥彭咁耐，公關功夫學到八九成，但係好難學到十足嘅，始終有啲文化差距，中國人對鬼佬又特別欣賞一啲，試問點樣可以改變呢種心態吖。