資深電台DJ蘇施黃昨日在主持商台節目時，透露自己患上乳癌，並於上月六日進行手術，現正接受電療。
商台DJ蘇施黃昨日主持《友誼萬歲》節目時，公開講述患上乳癌，現正跟癌魔搏鬥，是繼汪明荃、葉麗儀與陳家瑛等後，再有演藝界人士患上乳癌。
蘇施黃昨日透露早前在友人建議下，四月進行全身檢查，再於九月三十日作婦科驗身，之後證實患上乳癌。
乍聞消息嚇一跳
蘇施黃昨日在節目中平靜地說：「我五十年冇做過呢類型嘅驗身，檢查後發現有啲嘢，跟住再拮支針抽啲嘢出嚟驗，醫生之後就話有個好唔好嘅消息，係乳癌，當時嚇咗自己一跳。」
蘇絲黃續說：「成個過程好快，六號開刀，十一號已經出院，然後十九號已經返咗工，其實我𠵱家重要做少少嘢，重要做電療，本來唔想講畀大家聽嘅原因，係驚有時有啲唔舒服告兩日假，咁啲人會諗『阿蘇死得未呢？』咁我又唔希望咁去嚇怕大家，有記者朋友問到，我都好樂意同大家分享。」
幸未擴散續電療
而蘇施黃更在節目中鼓勵大家多點進行驗身，她說：「希望大家能夠做一樣嘢，唔好以為唔驗就冇事，我問過醫生發生咗幾耐，原來係發生咗兩至三個月，開始到𠵱家已經係第二期，好彩冇擴散，唔係成件事會好壞，我希望喺度奉勸各位女性每半年做一次mammograph（乳房X光檢查）同ultrasound（超聲波），無論男女都要快快脆脆去做驗查。」
