美股上周五勁升逾172點，港股噚日朝想照跟，但升至14320水平後便回軟，至午後才再次起飛，全日升幅跟貼美股，收14386，升170點，不過成交僅166.5億元，動力未足，暫難言轉勢。
不過，瑞銀果然夠勇，仍然維持今年恒指目標見17000，即預期在兩個月內（期內好有機會加息兩次，資金可能仍在流出），恒指可升逾2600點，升幅逾18%。黑客話，除非市場再度憧憬人民幣大幅升值，否則資金流出後，未必會大舉返轉頭將恒指踢高至17000。莫說話17000，如果年底前港股能升近16000，已經係一個奇迹，恒指現時能否守穩14000，其實都係兩睇。
市場傳出和黃（013）的3意大利因近期電訊股表現不濟，將上市集資規模下限由17.5億歐元降至15億歐元。消息令和黃早段反彈乏力，但午後傳出西班牙的Telefonica擬以180億英鎊併購O2，刺激歐洲電訊股急升，帶動歐洲股市早段造好，消息亦有利3意大利的上市集資，和黃全日升2.22%至73.40元。
H股股東唔着數
中石油（857）決定將吉林化工（368）私有化，其中H股每股2.80元，A股每股5.25元人民幣，A股作價較H股作價高87.5%，H股股東心裏當然酸溜溜。有芬佬朋友話，做H股股東認真唔着數，兩者平時收取的股息都係一樣，有乜理由股權分置而H股冇得賠，如今連全購價都有咁大差異，真係唔公平。雖然佢唔係持有好多吉化，但會投票反對私有化議案。
市場繼續玩私有化尋寶遊戲，中石化（386）旗下的鎮海煉化（1128）升4%至9.05元，而首三季勁蝕6.7億元人民幣的儀征（1033）更一度炒高12%至1.23元，最後收1.17元。
阿虎