《黑社會》拍續集，雖然事先張揚，但劇情未有曝光，大家估吓，下集，誰是接任達華龍頭棍的話事人。
上集交代過，任達華為了慰勞一眾賣命奔走把龍頭棍從廣州接回來的兄弟，曾經誇獎說，下一屆的話事人，分分鐘就是兄弟你們的世界了。亦即是暗示，我坐正，主要是配合阿公穩定壓倒一切的想法，任我識飛，頂籠坐兩年，任期一到，沒有誰可以釋法延長任期。以和為貴，各位有能者居之。
話咁快就泊住個好碼頭搵食的張家輝，馬上識撈，叫大佬做契爺。這個後生，打拼落力，捱得兩刀，生吞湯羹一樣掂。但跟風太貼，鋒芒太露，容易樹大招風，兩年未到，肯定已經被各方勢力「擺平」。做細的，心口掛個勇字才有出頭。做大佬，千萬別太揚，要學習「隱形富豪」，低調行事。甚至現成點，要像曾特首，跟住老細搵食，從肥彭到老董，中西照殺，演技從未穿崩。伴君如伴虎，當勞跟在老虎屁股後，絕不會吹口哨。「食塵」經年，回報的紅利出乎意料，阿公照住，終於殺出自己的字頭。
另一個東莞仔，最聽大佬吩咐，做買賣有交帶，又夠薑承擔撞警的責任，不肯着草，寧願入冊。這條黑底好漢子，肯定非禮賓府那個三十萬豪裝過的錦鯉池中物。不過因為有功，一旦恃寵生嬌，天地不容，隨時遭話事人整頓放逐去塞浦路斯做代辦。話事人身邊，最忌自己友能幹得滯，搶晒領導人鏡，點得死。這種材料，在曾特首班子中，誰最近磅？唔，皇仁仔，好自為之。