近年，市面上出現一種電流穩壓器，聲稱可以穩定電流，慳油又可加大馬力，講就無敵，我哋編輯部就嚟試一試先。結果原來係一個就唔夠，要打孖上先至有效果，至於有無慳油？答案係無嘅。
記者：伍旋卓
呢啲汽車電流穩壓器一啲都唔平，日本牌子約四百蚊一個，台灣出品就平一半。個個試完都有唔同評語，編輯部就買咗一個試吓，睇睇效果如何。我哋搵嚟一部三菱MR，1,600c.c.，換上原裝新火嘴、風隔和廠方指定型號機油，呢部車有高轉引擎，又有一般家庭車嘅性能，結果會客觀好多。裝上電流穩壓器後，電壓無變，引擎反應無變，耗油量亦一樣咁多。
我哋再買多一個，試吓效果又如何？由於要試穩定電流嘅實際效果，所以用並聯方式安裝。電壓表立刻由13.4V升到13.9V，加速反應比一個穩壓器好，但高速行駛下，分別不大。粗略的0-100km加速，快了一秒左右（無開冷氣）。
無慳油功能
跟住係開冷氣行車測試，有同無都一樣，電壓保持於13.3V，加速反應和原裝車差不多，對慳油亦沒有多大幫助。安裝兩個穩壓器，差不多要九百元，換來的效果不太明顯，如果有人突然畀番九百蚊我哋，相信會開心好多。