郭晉安同宣萱主演嘅無綫台慶劇《阿旺新傳》氣勢如虹，阿旺嘅儍氣角色既有童真，又充滿溫情，觀眾非常受落，上星期收視高開，平均收視有三十點、觀眾人次達一百九十七萬，而最高就有三十二點、有二百一十萬人次收睇，相比起其餘兩線劇集《胭脂水粉》平均收視二十七點（約一百七十七萬人次）同《佛山贊師父》嘅二十三點（約一百五十一萬人次），贏成條街。
今次阿旺雖然成績唔錯，唔單單係宣萱同郭晉安嘅功勞，劇集主線雖然都係圍繞住老婆仔同阿旺，但對比早年推出嘅古裝版，就加入咗好多新元素，馮仁昭覺得今次湯盈盈喺劇中扮演嘅哨牙醜女「笑好」一角成功跑出，估唔到過往只會做狐狸精出色嘅佢，今次可以拋低靚女束縛，全情投入做醜女，令觀眾另眼相看。
唐寧怕唔夠奸
而據馮仁昭所知，唐寧今次喺《阿旺》入面，第一次演奸角，為咗名利加害表姐宣萱，真係奸到出汁，所以唐寧前晚喺觀塘出席宣傳活動時，心情好緊張咁四周圍問人佢做成點，驚做得唔夠出色，但馮仁昭睇過之後覺得都唔錯吖！