美股上周五咁升法，港股跟隨好應該，恒指進帳170點。3大重磅股中移動（941）、滙控（005）與和黃（013），總共拉高恒指91點。
恒指收14386，再上啲，去到14500唔出奇，但唔適宜寄望太高，始終禽流感事件令人心驚驚。等到所有報紙頭版新聞唔再係禽流感，情況先至轉定。𠵱家落場賭輪，繼續用怡情注碼，或者做吓即市，朝種樹，晚𠝹板，𠝹唔到板有時蝕幾把鋸仔都冇辦法。
中移動C輪9306：每次恒指出現過百點升幅或跌幅，中移動例必有幾毫子上落，好多人要搵食。短炒窩輪策略，係中移動下跌幾毫子之時，低買C輪，即市對象係9306。
隻輪明年3月初夠鐘，溢價6.8%，槓桿率10.3倍（有效6.4倍），引伸波幅32.7%。乜嘢叫做低位，臨場執生可也。
平保C輪3827：平保（2318）收12.55元，升25仙。呢隻保險股，落得去升得番。吼下一轉回軟之時，低價買C輪。平保C輪冇幾多隻好揀，來來去去都係3827，明年6月中夠鐘，輪價11.4仙，溢價6.9%，槓桿率11倍（有效6.7倍），引伸波幅23.9%。
章盛