曾俊華局長昨天遠飛加勒比海，拜會圭亞那、巴巴多斯、牙買加等貿易部長，呢幾個國家香港人唔知有幾多人識，局長咁頻撲，無非為十二月在港舉行的WTO大會盡最後努力，希望呢個部長級會議有成果。
其實，有成果固然好，冇成果亦無所謂，反正WTO亦係WorldTalkOrganization。對於香港，如果會議順利舉行，示威團體意見能有效表達而又不致暴動，酒店零售業有實際得益，市民大眾生活冇受影響，咁就等於食一鋪大四喜。無論簽唔簽到協定，局長以致主責官員一定升官有望。
政府當然好想向全世界證明自己係一個文明都會，在許仕仁統籌下，各有關部門不敢怠慢。將軍澳工業邨對上兩個禮拜都有警察防暴演習，公立醫院員工會期唔准請假，重話停晒一切非緊急手術，使唔使咁驚呢？
鄭裕彤齋逗30萬袍金
新世界系公司上個星期陸續出年報，各管理層舊年收咗幾多人工大家都一清二楚。噚日到上市旗艦新世界發展出年報，主席鄭裕彤舊年大幅加薪兩倍，但其實係由04年度嘅10萬蚊加到05年度嘅30萬，因為佢只收取董事30萬袍金，唔知係咪因為佢近年只係「吃喝玩樂」，所以無支取薪金。
至於人工最高嘅當然係董事總經理鄭家純，佢舊年雖然要減薪130萬，但都有成1730萬元。單係基本薪金連津貼就有830萬，而純官嘅董事袍金亦係眾人之冠，有成70萬元，又分到60萬花紅，另外，佢舊年行使購股權，又賺咗720萬。
瑞銀獲選最佳經紀
財經雜誌《亞洲貨幣》（Asiamoney）昨日公布05年最佳經紀行調查結果，瑞銀（UBS）得票多，由去年第二位上升一級，成為今年之冠。一波（CSFB）亦上升一級至第二，德意志則停留在第三位。法國巴黎獲最佳進步獎（如果有），因為佢由去年排第12一躍7級，升至今年第5。各位可能會問，點解不見去年排第一位的公司?好簡單，因為去年冠軍里昂證券已於8月退出比賽。
當時有報章爆料，話里昂涉嫌造馬，重有高層教下屬點樣填選票。呢篇文章出街後，里昂即時宣布退出今次選舉，並會徹查，又話由於有員工過份熱心參賽，做出不當行為，因此已將一名地區經理停職，直至調查完成為止，另外幾名高層職員也被公司譴責。據講被停職嘅係里昂新加坡地區主管DavidEnticknap，現在唔知點呢？
任志剛攜眷遊上海
銀行公會每年一度的滬京訪問團昨天起程，今次團員中有位稀客，就係任志剛總裁夫人Miranda。好少曝光的任太，大家唔好以為佢變身做咗賓架，實情係佢趁周末假期，早兩日與任總先行抵滬小休，然後再加入大隊。時值深秋，上海和風日麗，任總公務繁忙，確實要偶爾偷得浮生，同老婆歎杯茶食個包。
訪問團抵達酒店，發覺任總同太太正準備食晏，任總與記者閑聊之際，任太非常投入Sudoku遊戲。
按照原來行程，任總同一班Banker今日下晝會同國務院副總理黃菊見面，所以大家諗住乘坐今日早機去北京。不過，星期日收到通知，會面改在上午，於是只好即刻改時間坐夜機，誰知去到機場，班機又有故障。要見副總理，真係唔容易。
李華華
