每次睇到啲人將一啲菜根切去掉咗，真係好心痛。雖然唔係樣樣植物嘅根都食得，但其實大部份都好有營養，枸杞根和莧菜根就係嘞。前者可以煲湯，治尿酸過多同關節炎。切下枸杞根，曬乾之後，準備半條鯽魚，放進清水中，再加生薏米、竹笙，連埋曬乾咗嘅枸杞根煲湯，煲到咁上下落陳皮、鹽。既有益又好味，對老人家身體特別有幫助。
至於莧菜根，只要加些魚片、瘦肉嚟煲湯，就可以去濕，萬試萬靈。關於植物和蔬菜的營養，有時聽陳婆婆講，都覺得有啲誇張，佢話莧菜除咗可以去濕，重有豐富鈣質，對骨骼生長有幫助，重可以瘦身減肥㖭！都唔知真定假。不過佢日日有運動，都好瘦咯，唔使減肥啦。
晚上望吓阿標，唔知係咪佢坐姿有問題，忽然覺得佢個肚腩都幾大，令我想起亦舒有本小說，係講看着丈夫個肚腩像車胎，覺得時光飛逝，有啲欷歔。我諗要叫佢多啲飲莧菜湯啦！（三十五）
阿花