數碼影音：手機Send相袋裝Printer即傳即印

時下嘅手機有過百萬像素已經係好普通嘅事，不過有時影咗好靚嘅相，想話Print出嚟放入銀包，要等到返屋企搞一大輪，都幾唔方便，好彩富士最近推出咗一部手提式打印機mp-70，Size只有一隻CD咁大，而且重直接對應手機，一Send就Print到，方便到極點！

記者：梁瑋瑜
攝影：陳智良
ImageModels：Seven、Ivy（Starryland）
鳴謝：CafeTrois

兩粒電印過百張

富士呢部mp-70，重量只有205g，只係重過一部iPod少少，拎出街好方便，最重要係部機採用兩粒CR2鋰電（售價約$20一粒），就可以印足130張相，就算真係用到無電，都可以好方便咁喺便利店買到嚟補充，唔似得其他手提Printer咁只可以用內置鋰電池，絕對係一部真正手提Printer！
mp-70嘅操作介面非常簡約，機面有數字顯示機內剩餘相紙數目，Print完一張相想再Print，可以㩒Reprint掣，唔使次次再Send相，慳番好多時間！

■有Reprint可以重印上一張相片。

■用兩粒CR2電池就可以印130張。

紅外線夠方便

市面上大部份有鏡頭嘅手機都設有紅外線，相信大家都唔會下下拎條USB線出街，mp-70以紅外線作為唯一嘅傳送途徑，其實係相當實用，對應市面上大部份手機，又唔需要好似藍芽咁需要好多步驟去設定，十分之方便易用，好多街坊玩過都話正。
記者試過用不同手機印相，傳送速度略有分別，好似使用有320萬像素嘅SHARPSX833傳送一幅約800KB嘅相片，需時大約3分鐘，而用130萬像素嘅SEZ800iSend約300KB嘅相就要2分鐘左右，整體嚟講略嫌慢咗少少，要留意mp-70最高支援900KB檔案。

■大部份手機都有紅外線，借畀邊個Friend印相都無問題。

■出相位喺機頂。

■用紅外線傳送，夠晒方便。

防水防刮相紙

mp-70採用LED打印技術，好處係唔使換墨換炭粉，而且唔需要好似用熱昇華技術咁要印幾次，打印速度快得多。呢部機使用富士手提打印機Pivi系列專用相紙，外形同即影即有相紙十分相似，都係有一個白框俾大家寫吓字畫吓公仔，只須幾秒鐘，相片就會走出來，再經過24秒曝光，畫面就會浮現；一包十張嘅相紙售價係$45，計起嚟$4.5一張，比起$30（2張）影貼紙相平咗一大截，最正係呢種相紙外有保護層，防水防刮，更加襟睇襟擺。