最近同朋友去apm睇九點半，出到嚟居然被我無意中發現有一間開到凌晨2:00am嘅潮州舖，門口一大張poster寫住話九時至凌晨二時入座，打冷食品一律半價，小炒菜式一律七折，重要免加一免茶芥，每人夾幾十蚊就可以捧住個肚走，我同兩個餓鬼friend當然二話不說衝入去啦！
記者：黃婉冰
攝影：譚盈傑、周旭文
Models：Vicki、Lo
全日免茶芥免加一
全日除有早、午、晚三個不同的優惠時段外，更會免收任何酸菜、茶芥甚至加一服務費，換句話講，叫四碟餸就只會收四碟餸菜價錢，一個崩都唔會收多。雖然茶芥一般只係幾蚊位，但如果幾個人一齊開餐的話，計落都幾襟計，閒閒哋隨時慳番幾十蚊。
叫打冷最抵食
每晚一到九點至凌晨兩點期間入座，所有菜式都會「大打折扣」，雖然平咗一截，但經過日夜真人測試後，發現份量同味道仍然保持水準，其中潮州滷水食品最抵食，墨魚、大腸、鵝片、等可以揀單拼或雙拼，另有其他潮式打冷小菜如鹹菜豬肚湯、凍烏頭、煎蠔餅共十多二十款，全部一律半價，所以全部叫潮州打冷就最抵食。
Order4款相同菜式比較
結果：無縮水喎！
為咗證明呢個9:00pm後特價優惠無花假，我同兩個餓鬼分別喺晏晝一點同夜晚九點叫咗四款相同菜式，睇睇個份量有無因為做特價而縮咗水，實地測試結果？當然係無啦，而且其中一碟嘅牛𦟌重大碟過晏晝嗰碟㖭，好抵食呀！
玻璃香酥鴨$60/例牌（午市）
已買少見少的香酥鴨，最頂層是鬆化的炸醬，第二層是香滑的芋茸，最底一層是起骨去皮的鴨肉，入口先是一陣陣軟綿綿的芋茸，再來便是香濃的鴨肉。
$50/例牌（消夜）
份量一樣，但芋茸頗飽肚，食兩件已開始有點膩感，所以叫例牌已非常足夠。
滷水拼盤$60（午市）
滷水拼盤有紅腸、腩肉、墨魚、雞蛋、鵝片、鵝翼等六款傳統滷味，值得一提的是，墨魚烹調後塊塊依然白雪雪，完全無用橙色的色素加染，食到最後，重有薄薄的蘿蔔片墊底，蘿蔔浸滿滷水汁又夠爽脆，幫助消化，比傳統的炸豆腐和芽菜更健康。
$35（消夜）
同樣有六款滷味，但墊底就由蘿蔔變成炸豆腐。
汾酒牛𦟌$30（消夜）
消夜份量明顯比午飯時段重要多，$30夠晒抵食。
$40（午市）
用自家秘製的滷水汁炮製的牛𦟌，肉質非常腍滑，筋位腍得來依然有𡁻頭，滷水汁味道比一般清香，用來送酒最好。
京醬蝦球$78（午市）
食法與咕嚕蝦球差不多，但京醬味道比甜酸醬多甜少酸，與蝦球的鮮味更匹配。蝦球爽脆充滿京醬的獨特甜味，夾着用來盛放蝦球的薄脆同食，咬口更豐富。份量亦不小，一碟有11隻蝦球，四個人叫一碟實唔使爭餐死。
$54.6（消夜）
夜晚食一樣有十一隻蝦，果然無縮水。
潮館（35425788）
地址：觀塘道418號創紀之城5期apm第5層l5-1舖
營業時間：上午9時至凌晨2時