煲呔呢期做咗出埠推銷員，向老外勁sell政改方案，搞到留守香港嘅肥龍一方面要四出向區議員內銷，又要做埋署理特首睇住個檔，周身唔得閒。
噚日係明愛周年籌款賣物會，身為天主教徒嘅肥龍，幾忙都抽空去剪綵，同場重有莊鍾賽玉、梁王培芳、羅保爵士伉儷同孫明揚伉儷。
肥龍側側膊封口唔講政改，陳日君就啱啱喺羅馬返嚟，唔知係咪未得閒睇五號報告，所以冇向肥龍扁嘴，反而一齊響賣物會shopping，全程黐到實密密斟，細聲講大聲笑。
連續死頂咗兩個星期，肥龍終於可以輕鬆吓，早排要乞票嘅佢，家陣揸起玩具槍射汽水罐，單起隻眼扮神槍手都咁入型入格，睇嚟咩角色都難唔到佢，真係可以封佢做影帝。肥龍跟手重大破慳囊，買咗個三十幾蚊嘅相架，算係「少少無拘」啦。
傳真︰2623-9278
電郵︰[email protected]