雖然呷醋嘅通常係女仔，但唔代表男士唔會喎。噚日泛民嘅反政改集會，吳靄儀一講到45條關注組會組黨，現場即刻掌聲如雷，個個都希望佢哋快啲組黨，壯大民主派力量。
其中卿姐就最舉腳支持，重攬住吳大狀讚佢乖女，話要錫晒佢咁話。點知呢一句原來好敏感，事關現場兩位男士梁耀忠同李卓人即刻呷醋，阿忠話同卿姐一齊爭取民主咁多年，點知呢位戰場上嘅伴侶，竟然最錫係吳大狀，聽到個心都好酸。
阿人就話𠵱家個個都自稱民主派，如果卿姐個個都錫，咁咪連煲呔都要錫埋？好似驚卿姐嘅香吻會分薄晒咁噃。引起現場一陣酸味嘅卿姐當然唔會令盟友失望，話總之係真正嘅民主派，就一定個個都咁錫喎。
冇開口要求卿姐送吻嘅長毛，就主力狅插煲呔，佢話作為天主教徒嘅煲呔，成日講大話指港人唔要○七/○八普選，直情犯咗十誡入面「不可作假見證」嘅誡條。長毛又話𠵱家個政府好似黑社會，成日用政改恐嚇市民，搞到佢忍無可忍，一定會成日落區叫港人振作，唔好俾煲呔喺港人頭上屙屎。
傳真︰2623-9278
電郵︰[email protected]