經濟學界最近嘅熱門話題，由香港科技大學教授丁學良點起，丁教授去年底出版《甚麼是世界一流大學》，今年初更以此為題喺北京大學發表演講，已經好惹火，點知佢冇有怕，又喺國內「發炮」。
話說丁教授近日接受內地傳媒《中華工商時報》訪問時，被記者問到：「您覺得中國有沒有真正意義上的經濟學家？」佢答話：「最多不超過五個。國內有的著名經濟學家，連在國際上最好的五十個經濟系裏做研究生的資格都不夠，有的經濟學家還沒有對經濟科學做甚麼樣的貢獻就想着獲諾貝爾獎。」非常唔客氣。
丁教授話，之所以會出現咁嘅現象，最重要嘅原因係中國主流經濟學家，將太少精力用嚟做經濟科學研究，而將太多精力，用嚟為某一利益集團說話。
猶不及銀行分析師
佢話喺中國嘅經濟學家中，有為唔同產業代言嘅人，喺西方雖然都有，但就好少。佢又話，西方從事經濟科學研究中最優秀嘅人唔係咁嘅，咁嘅人只能受銀行、投行僱用，從事產業經濟學嘅研究。喺丁教授眼中，中國絕大部份所謂經濟學家所做嘅事情，同西方國家銀行入面嘅經濟分析師相似，但水平重及唔上人哋。
記得中大教授郎咸平曾批評內地民企，仲舉科龍顧雛軍為例，遭到內地經濟學家圍攻，最後顧雛軍出事，證明郎教授冇錯。今次丁教授再扮演《國王的新衣》裏面個細路，未見內地教授跳出嚟回應，但就有網民指佢唔清楚內地情況。
不過，生於安徽農家嘅丁教授，八五年出國往哈佛讀博士學位前，一直喺國內讀書，點會唔清楚內地情況？
傳真︰2623-9278
電郵︰[email protected]