張栢芝早前入住聖保祿醫院時，一路喊晒口咁對住個電話講「BB好重要，一定要保住個BB」，之後栢芝就話自己入院係因為疲勞過度發燒，亦否認懷孕傳聞，不過與此同時，馮仁昭就收到風，原來栢芝同母異父嘅家姐戴碧芝有咗，𠵱家喺加拿大待產，栢芝嘅媽咪，已經過咗加拿大照顧個女。
視如己出
噚日馮仁昭就戴碧芝大肚事件同栢芝經理人通過電話，佢經理人就話：「戴碧芝嘅預產期係出年四、五月，栢芝知道自己就嚟做阿姨好開心，重諗住到時攞假去加拿大睇個BB出世，佢好錫佢家姐，雖然唔係栢芝有咗，但家姐生BB，佢覺得好似自己所出一樣。」
匿埋煲煙
前晚張栢芝同陳小春，就喺中環遮打大廈繼續拍《最愛女人購物狂》，栢芝重趁空檔，匿喺一角講電話同煲煙，後尾發現有記者影相，佢就叫工作人員用黑布阻擋，一改之前任影唔嬲嘅態度，可能係怕老外男友知道佢又食煙會唔高興啦。
