美股上周五勁升，理由係經濟增長理想，以及一啲公司宣布業績亦靚靚。單睇美股升幅，今日揸港股者冇咁閉翳，揸C輪者輸錢幅度會縮細啲。但禽流感單嘢，好難預估點收科，對股市會起壓住作用。炒輪宜限注，或呢頭上車，嗰頭落車。
滙控（005）下周一宣布派第3季度股息，照往年習慣，會喺本月低前1個星期截息，估計會派0.14美元（1.09港元），較去年同季增0.01美元。呢個股息，將拖低恒指39點，炒短期恒指輪者，要計埋除息因素，炒滙控C輪者，亦要計埋呢個因素。
恒生（011）亦將喺下周一宣布派第3季股息，估計派舊息1.10元，只拖低恒指6.1點，影響有限。照往年習慣，恒生12月初始除息，只會影響12月恒指。
滙控C輪4789：短期睇好滙控者，可買C輪4789，明年4月初夠鐘，溢價2.8%（計埋滙控月底前除息因素，實際3.7%），槓桿率30.5倍（有效14.9倍），引伸波幅14.2%。
滙控P輪9212：稍後睇淡滙控者，可買P輪9212，溢價0.7%，計埋股息因素，實際係負溢價0.2%。
章盛