中大新聞及傳播學院創立咗四十年，猛人輩出，其中七三年畢業嘅關鄭麗敏Heidi，行內人都識，佢最近重返官場做肥龍許仕仁嘅新聞秘書。
肥龍做財經事務局局長打大鱷時，Heidi已經係佢公關大員，之後肥龍過檔積金局，Heidi亦跟住走。肥龍退休，佢就轉去機管局，直至煲呔吹雞搵肥龍出山，Heidi臨急受命即時歸隊。
Heidi接受師兄妹訪問時話，自己最鍾意忙，又唔怕困難，工作至今印象最深係畢業後加入TVB，負責為《總督奇趣錄》搜集資料；另一難忘經歷係做環保署，拍咗輯「清蒸污染海鮮」嘅廣告，後嚟當局擔心損害香港形象抽起停播。
Heidi工作滿足，家庭生活亦美滿，老公係高三屆嘅師兄關越強，兩人七六年結婚，兩個仔都已經大學畢業，確係羨慕死唔少人。
傳真︰2623-9278
電郵︰[email protected]