薛凱琪前晚舉行處女音樂會，罕有性感低胸賣大包，嘉賓森美取笑她身材不好，又指她是長頸族人，Fiona唱到《奇諾李維斯回信》時，又喊又笑，郭富城即出場為她抹眼淚，還自認是K先生。
薛凱琪（Fiona）前晚在九龍灣國際展貿中心舉行「加州紅903熱火樂團音樂會」，請來森美、鄭融及郭富城任嘉賓，陳鍵鋒、吳雨霏及劉浩龍則到場欣賞。
長頸遭揶揄
Fiona甫出場即讓人眼前一亮，一身黑色低胸裝惹來全場觀眾尖叫，可算是她入行以來最性感一次，當與好姊妹鄭融出場時，Fiona笑謂：「我好羨慕佢嘅身材，我都想瞓吓辣椒床。」Fiona隨即擺Ｓ形姿勢，十分搞笑。
森美出場則不停嘲笑Fiona，他說：「你點性感個陰影都唔會深，我懷疑你下唇有問題㖭。」接着螢光幕播放多張Fiona以手指掂下唇的照片，又播放長頸的非洲女人相片，Fiona即笑說：「我唔係長頸族人。」
Fiona致謝詞時頻說好驚，更不停哭，她說：「第一次舉行自己個人音樂會，由細到大好仰慕一個人，唱歌拍戲都叻。」隨即獻唱張國榮歌曲。
Fiona後來唱《奇諾李維斯回信》時，又哭又笑，如是者哭了約十五分鐘，突然郭富城出現，Fiona哭得更厲害，城城為她抹眼淚，Fiona感謝城城拔刀相助，城城即說：「我係AaronKwok，係Ｋ先生，你係Ｆ小姐。」Fiona攬着城城時還高舉勝利手勢。
專登露bra邊
事後Fiona表示城城一直聲稱無暇出席，想不到原來給她驚喜。問到有否托胸示人，Fiona緊張道：「我冇托冇墊，promise冇講大話，只係腰束緊啲咋。露bra邊係專登設計，內衣外露feel嘛。」
採訪：駱華齡 攝影：何榮亮
