煲呔結束美加之行，噚晚返香港，佢老哥乜人都見，但就係見唔到布殊總統，對佢嚟講當然有啲可惜，因為呢個世界最怕人比人，老董當年獲克林頓接見，煲呔只見副總統，好冇面。但董家同美國佬關係咁深，煲呔呢方面真係望麈莫及。
○二年撞正911
除咗家族關係，煲呔係名副其實嘅美國掃把星，所以布殊唔見佢實在大條道理。因為煲呔去親美國訪問，美國一定出事，一係恐怖襲擊，一係打大風，今次就整單特工門案。八方記得當年煲呔笑自己成為美國人嘅災難預警系統，今日睇嚟都重有效。
話說煲呔○二年首次以政務司司長身份，戴住個飛龍標誌去華盛頓訪問，點知撞正911恐怖襲擊，你話幾大鑊，佢自己冇事算執身彩，結果原本安排同副總統切尼嘅會面就取消咗（切尼唔知去咗邊），可以咁講，切尼今次見煲呔，其實只係補番上次無限期押後嘅約會。
至於佢○三年917美國之旅，就撞正超級颶風依莎貝爾吹襲東岸，當地政府機關全部暫停辦公，連布殊都走埋，當時嘅國務卿鮑威爾都算好人，兼夾唔信邪，打大風都專登由大衞營飛返華盛頓，打開聯邦大廈同國務院道門見呢位掃把星，免得佢空手而回。
切尼頭痕特工門案
今次煲呔到達前，佛羅里達州又打風，布殊要去視察災情，當然唔得閒見佢。最後執番兩個桔，一個係切尼，一個國務卿賴斯，好唔錯喇。
其實切尼都算唔話得，佢位幕僚長利比因特工門案，啱啱被控作假證供等五項罪名，分分鐘連切尼自己同布殊都拖落水，佢邊有心機見外賓？所以切尼肯見煲呔，好畀面㗎喇，但係就取消photocall（攝影時間），費事班記者問長問短。咁見面講乜？煲呔喺會後引述切尼對香港近況嘅評語係"sofar,sogood"，等於冇講過嘢；至於政改方案，就形容係"awelcomechange"，可能佢都冇心聽煲呔講乜啦，有變化咪話歡迎囉。
煲呔做慣推銷員，一向面皮夠厚，梗係話自己受歡迎啦。好似見切尼當日咁，佢老哥就連踩七場，見完副總統、三個美國議員、傳統基金會、布魯斯金研究院，重出席晚宴。佢見參議員DianneFeinstein時，無啦啦講到香港傳媒，笑笑口同Dianne呻話，啲香港傳媒對佢唔多好，成日諗住想折磨佢！
傳真︰2623-9278
電郵︰[email protected]