明日星期二，快活谷跑夜馬，係為咗配合澳洲墨爾本盃大賽，澳洲時間快香港三小時，下午賽馬，等於香港早上十點之後，每年快活谷馬場都在早上開放，方便會員及馬迷入場下注。十一年前，左丁山與成班老友在馬會食早餐，跑幾場馬，食埋午餐，睇完墨爾本盃之後，成班人先至返工，好不輕鬆。
𠵱家呢？冇呢支歌唱咯，正是做到失魂，由朝緊張到晚。邊度可以蛇王去馬場吖。呢晚喺馬會食「大牌檔」自助餐。一位侍應講：「係唔係人大咗，就緬懷過去好時光呢？十幾年以前我哋返工就講放工，夜晚去disco、下晝三點幾就有會員嚟打波，佢哋秘書識得有事就打電話嚟酒吧搵佢哋，大家都唔知幾輕鬆。呢幾個會員好耐冇嚟打波咯，偶然見到一個嚟食飯，我問佢點解唔再打波，佢話得閒死唔得閒病，晚晚九點幾先至放工喎。左生，點解人人都做得咁辛苦？點解以前可以到咗下午三點，就可以鬆一鬆？」
左丁山都唔識點解。諗到一個初步解釋就係中國沒有富起來之前，大家用半邊腦就可以賺錢，現在中國內地競爭力驚人，廠家老闆唔入大陸唔得，白領階級驚死輸晒，於是唯有人人加倍勤力。
一年一度星期二跑夜馬，立法會議員鬆晒，聽晚會有唔少議員入場。每次星期三夜馬都與立法會大會撞到正，議員馬迷?馬主如張宇人、田北俊，有時連自己隻馬出賽，都冇法子入場。欣逢星期二有夜馬，佢哋到馬場行吓，可以當做減壓。講起星期三夜馬，記得十幾年前，張鑑泉議員有隻馬叫做「美妙龍」（Medaville）（英文名稱與唐翔千家族控制之電子公司同名），星期三晚出賽，左丁山問張議員有冇希望，張議員話：「練馬師夏志信對我講，隻馬未掂，如果立法會會議未完，唔使趕住入場。」左丁山刨馬，認為隻馬有機會噃，一於買獨贏、位置，竟然爆出大冷，因張鑑泉不在場，夏志信自己拉頭馬。而今兩人皆已作古，左丁山諗起此事都有啲欷歔。