海關及電影業費盡心思，欲將網名「蠱惑天皇」之BT友殺一儆百，樂觀地認為電影業及樂壇從此「東山再起」。蠱惑天皇從被捕到開審，均一副高調者姿態，雖然已判罪名成立，只欠判罰刑期，不過古先生仍以勝利者嘴臉示人，彷彿告訴香港海關，完成全球首宗因BT上載而成功入罪之案件，絕非取得真正之勝利，其實骨子裏又含有甚麼啟示呢？
文：徐影龍
首先大家要明白，蠱惑天皇之所以被成功起訴，最主要原因係上載姿態過份高調，被控方定型為「有心」侵犯版權行為，再在家中人贓並獲搜出3套相關VCD，海關才能以上載非授權電影而落案。
換句話說，佔九成以上玩BT之人士，尤其選擇外地Seed之用家，香港海關便跟外國一樣，難以一一入罪，故網上各大小BT討論區上，網友不但未對蠱惑天皇被入罪而有所警惕，更甚者重要同聲同氣話未驚過，而且亦無意放棄玩BT。
這篇文章並非鼓吹大家跟海關對着幹，事實上，有關當局已研究相關程式，企圖四處散播假Seed，所有有份下載之IP用戶將全部記錄在案，真正TakeAction時就有晒證據，到時真係「要幾多有幾多」！
BT打擊老翻市場
筆者立場絕對唔贊成大家侵犯版權，沉迷BT亦非好事。不過筆者並不大贊同「打擊BT」就等同「救市」之說！好多人未必想到，BT的最大利益衝突者可能是「老翻集團」！
話說早幾年未有BT時，老翻電影成行成市，周街一百蚊四隻，截至BT一出，人人網上免費Download，筆者曾走訪灣仔某商場專賣老翻之店舖，從那些看檔蠱惑仔口中得知，令佢哋閂門嘅並唔係香港海關，BT唔使錢網上任Download，啲人連買老翻錢都慳番，正所謂「冇錢賺嘅生意殺頭都冇人做」，所以近年「老翻業」生意先至一落千丈；但「打擊BT」後（係咪真係可以完全杜絕？），是救市？還是另一次老翻風潮？咁真係要放長眼睇埋落去！